"Берасцейская Вясна"

06.03.2010
Інвалід адмовіўся ад пашпарту і ўжо тры гады не атрымлівае пенсію

У дакуменце ён знайшоў “лічбу д’ябла” і звярнуўся ў камітэт па правах чалавека ААН.

63-гадовы праваслаўны вернік з Брэста Мікалай Лаўранюк угледзеў у пашпарце “лічбу д’ябла 666” і адмовіўся яго атрымліваць. А без дакумента Міністэрства працы не налічвае яму пенсію.

“Міністэрства працы і сацыяльнай абароны адмовіла ў пенсіі. Не атрымліваю ўжо 3 гады, ― паскардзіўся пенсіянер Еўрарадыё. ― Між тым я яшчэ і інвалід 3-й групы. Звяртаўся па пенсію спачатку менавіта з-за інваліднасці. Атрымаў адмову. А потым адмовілі і ў пенсіі па ўзросце. Прычына — тое, што я адмовіўся атрымаць пашпарт новага ўзору з рэлігійных меркаванняў. Бо ж у ідэнтыфікацыйным нумары утрымліваецца лічба д’ябла “666”. Гэтую сістэму ўвялі дзеля здзеку над праваслаўнымі вернікамі-хрысціянамі”.

З сабою ў спадара Лаўранюка ладная тэчка з дакументамі. Адзін з іх, старонак з 10, — экспертыза, зробленая Цэнтрам энергаінфармацыйных тэхналогіяў Санкт-Пецярбургскага дзяржаўнага інстытута дакладнай механікі і оптыкі. Там абгрунтоўваецца карэляцыя ідэнтыфікацыйнага нумару і трох шасцёрак. Гэты і іншыя дакументы фігуравалі ў беларускіх судах.

Мікалай Лаўранюк: "Я звяртаўся ва ўсе судовыя інстанцыі, да Вярхоўнага і Канстытуцыйнага. Канстытуцыйны суд накіраваў у Міністэрства працы і сацыяльнай абароны прапанову, каб вернікам знайшлі спосаб прызначаць пенсію без уліку пашпартоў".

Аднак пакуль сітуацыя не змянілася, і атрымліваць пенсію без пашпарту па-ранейшаму немагчыма, распавяла нам кіраўнік камітэта па працы і сацыяльнай абароне Брэсцкага аблвыканкама Лідзія Сафроненка:

“Нічога не змянілася. Чытайце Палажэнне аб прызначэнні пенсій, пункт 7. Для прызначэння пенсіі патрэбны пашпарт. А без пашпарта нельга. Будзе прынятае нейкае рашэнне — налічым пенсію. А пакуль так, як ёсць”.

Гісторыя неяк скранулася з месца падчас візіту патрыярха Маскоўскага Кірылы, кажа Лаўранюк. Тады “пенсіянер без пенсіі” склаў да яго прашэнне, а патрыярх пераадрасаваў яго экзарху Філарэту, а той звярнуўся ў Адміністрацыю прэзідэнта. Гэтаксама пасля звароту да Кірылы новапрызначаны міністр унутраных спраў Анатоль Куляшоў накіраваў у Міністэрства працы і сацабароны прапанову неяк развесці налічэнне пенсіі ды пашпарт. Пакуль рэакцыі няма.

Паралельна Мікалай Лаўранюк звярнуўся ў камітэт па правах чалавека ААН у Жэневе. Да яго далучылася яшчэ адна пенсіянерка без пашпарту — Таццяна Ячнік.

Ліст кіраўніка Беларускай праваслаўнай царквы мітрапаліта Філарэта ў адміністрацыю прэзідэнта з просьбай вырашыць пытанне з пенсіямі для паствы.

Фота — bymedia.net

Яўген Бяласін

http://euroradio.fm/by/1144/reports/44766/

Падпісацца на навіны

Супрацоўніцтва

Нацыянальны фонд падтрымкі дэмакратыі прымае заяўкі на ўдзел у праграме 2011-2012 г.

Памятныя даты Беларусі

Каляндар памятных дат Беларусі

Гарачая навіна

2010.09.03 ЗАЯВА аб выхадзе з сябраў Партыі БНФ

2010.05.17 Зварот да выбаршчыкаў кандыдата ў дэпутаты Вялічкіна Уладзіміра Аляксандравіча

Збор паштовак

Берасцейцы - дзеячы БНР

Web-admin © 2010. Усе правы належаць праваабарончаму грамадскаму аб'яднанню "Берасцейская вясна".
Усе матэр'ялы свабодныя для не камерцыйнага выкарыстання.
Пры перадрукоўцы спасылка на крыніцу абавязковая.

Наведвальнікаў on-line: 8 Сёння: 76 За месяц: 241 За ўвесь час: 4073