12.08.2008 Вызначаны парадак
Цэнтрвыбаркам прыняў пастанову аб парадку выступленняў кандыдатаў у дэпутаты ў дзяржаўных' СМІ.
Як паведаміў сакратар ЦВК Мікалай Лазавік, кандыдат у дэпутаты мае права апублікаваць сваю перадвыбарную праграму ў адной з наступных газет: "Звязда", "Народная газета","Рэспубліка", "Беларуская ніва". Акрамя таго, замест гэтых выданняў праграма можа быць надрукаваная ў абласной або раённай газеце, якія выходзяць на тэрыторыі выбарчай акругі кандыдата.
Па аб'ёме публікацыя не можа перавышаць 4 тысячы друкаваных знакаў (каля дзвюх старонак фармата А-4) з прабеламі. Тэкст перадвыбарнай праграмы неабходна падаць у рэдакцыю не пазней за 7 верасня.
Кандыдаты ў дэпутаты таксама маюць права выступіць на радыё і тэлебачанні: тыя, якія зарэгістраваныя ў акругах Мінска і Мінскай вобласці эфірны час будзе даваць радыёстанцыя "Сталіца", астатнім - абласныя тэлерадыёкампаніі. Выступленні кандыдатаў ад Берасцейшчыны ў запісу (па 5 хвілін) будзе трансляваць абласная тэлерадыёкампанія: па радыё з 18.00 да 19.00, па тэлебачанні - з 17.30 да 18.30. Тэлерадыёкампаніі абавязаны загадзя інфармаваць слухачоў і гледачоў аб выступленнях кандыдатаў з указаннем нумароў іх акруг.